السلام علييكم ورحمة الله وبركاته
كيف حالكم واحوالكم ؟؟
موضوعي يمكن يكون موضوعين بموضوع شوفو القصة وبعدين بنتفاهم
هاد يا جماعة الخير انا كنت توجيهي بالاردن
والحمدلله نجحت الفصل الاول وعدها طلعت نتيجة الفصل التاني والله يستر
هسة بعد التوجيهي ايش فيه؟؟؟؟
في جامعة وما ادراك ما الجامعة
هسة بما اني غزاوية ولا احمل الجنسية فرح يعتبروني زي الاجانب
يعني راح ادفع بالدولار لكن احنا بندفع بما يقابله بالدينار
المهم
هسة اللي بيحملش الجنسية اذا بدك تدرس بدك تتك مصاري
لو جبت مية والا خمسين نفس الشي ما بيطلعو على معدلك
بيطلعو على جنسيتك تحمل الجنسية معناتو زيك زي الطالب العادي
ما معك الجنسية روح ادفع مصاري
ابوي كان بس يشوفني بتعب وانا بادرس بيقولي يابا تتعبيش حالك
مصارينا بجيبتنا واللي بدك اياه بتدرسيه
لو جبتي واحد موافق ههههههه
قلت لاهلي ايش؟ انا لا بفكر لا بهندسة ولا بطب من الاخر
قلت خليني افكر بالمنطق>>>> بتعرفونيش بس افكر منطقيا
اشوفلي تخصص اللي اذا احتجت شهادته وبدي اشتغل
الاقي شغل على طول
الا وهو محاسبة
طلعت ساعة المحاسبة اذا بدك تدرسها فوق ستين دينار لغير الاردني
ما حدا يسألني قديش انا بس بعرف بالاردني عاد ترجمو لبعض بالعملات
طب يعني وين اروح انا؟؟
بتعرفو في الي واحدة بتقربلي بدها تدرس هندسة مدنية
الساعة بتمنين دينار
بقولنا ابوها انه السنة الواحدة الها رح تكلفه شي 3000 دينار
طب اللي زي هاد ايش يعمل
يعني شقا عمره رح يوديه تدريس جامعات
وعنده غير هالبنت تلاتة ورا بعض حيفوتو الجامعة
وكله عحسابه وتك يخو مصاري
قال بقولولي قدمو عن طريق السلطة الفلسطينية انه عحساب السلطة ندرس
طب السلطة على مين والا على مين راح تلحق تدفع
بتعرفو انه في طلاب غيرنا يحملون الجنسية ما بيدفعوش شي هاد اولا
تانيا وهما بيدرسو و بياخدو راتب
هاد اذا طلعلهم مكرمة
وفي طلاب تانيين يمكن دراستهم الجامعية كلعا ما بتيجي 300 دينار
واحنا مساكين بندفع
بقولولي اخواني تعالي ادرسي بغزة ارخص
طب اذا كان اهل غزة بدهم يطلعو منها
وناس مش طايقة حالها
وبعدين حسيب اهلي واروح ادرس هناك برضه صعب
لنفرض انه ربنا يسرها وتنيلنا على عينا ودرسنا واجينا للشغل
طبعا واكييييد مية بالمية مؤسسات حكومية ولا تحلم انك تشتغل فيها
فهادا معروف انه لا تعب حالك ولا تقدم من اصله
طب المؤسسات الخاصة بيوظفو مو ما بيوظفو
بس هسة عشان مشكلة الاقتصاد اللي بيتدهور قاعد وبيدهورنا معاه
الشركات الخاصة بطلع موظفيها وبتسكر
يعني كمان سكرت بوجهنا
طب انا وين اروح؟ والا وين اودي حالي؟؟
على فكرا هاي مو مشكلتي بس مشكلة كل من لا يحمل الجنسية
وبعدين اذا عرفو انك فلسطيني فهاي مشكلة واذا عرفو انك غزاوي فهاي مشكلة اكبر
ولسة بيطلعلك واحد من جوا القطاع بقولك والله انا بس لو يطلعوني من القطاع
بشتغل وبجيب مصاري
على اساس انه الشغل بيستناه على معبر رفح بس اطلع
اذا كان اهل البلد (يحملون الجنسية) نفسها يا دوووووووب عارفين يدبرو الهم شغل
وبكونو قلقانين انهم ممكن يطلعوهم ببساطة
وطبعا بدول تانية مصايب اكبر من هيك
وخصوصا للفلسطينية بتذكر مرة طلعو معلمين بالامارات فلسطينية ما بعرف ايش صار
فيهم بعدين رجعوهم والا لا بس احنا بنحكي انهم اتخذو فيهم اجراء
ومو بعيد تتكرر
ومرة كمان احفاد خالتي بليبيا صغار لسة
طلعوهم من مدارسهم وقعدوهم اسبوع تقريبا اذا ما كان اكتر
عشانهم فلسطينة
هوا ايش فيه الناس بدهاش ايانا ههههههههههههه
والله هم بيضحك وهم ببكي
يالله ناقشوني لشوف وين نروح احنا؟
واحكيلي عن مشكلتك ببلاد الشسمو الغربة؟
وخلص انا عصبت وتعبت ونرفزت
يالله سمعوني اغنية دايما دموووووووووع
والدجاج اللي عباب المقعد حدا يجي يشيلو عشان اعرف اطلع